Першы энергаблок БелАЭС выведзены ў чарговы планава-папераджальны рамонт. Аб гэтым паведамляе БЕЛТА са спасылкай на Telegram-канал "Мінэнерга Афіцыйны".

Рамонт штогод праводзіцца на атамных станцыях у адпаведнасці з устаноўленым рэгламентам для забеспячэння надзейнасці функцыянавання абсталявання і тэхналагічных сістэм.

На першым блоку БелАЭС выканаюць частковую перазагрузку ў рэактар свежага ядзернага паліва, правядуць рэвізію абсталявання рэактарнай устаноўкі, турбагенератара, галоўных цыркуляцыйных помпаў і іншага абсталявання і тэхналагічных сістэм.

Спецыялісты таксама правядуць кантроль металу і дыягностыку зварных злучэнняў абсталявання. Акрамя таго, будзе рэалізаваны шэраг мерапрыемстваў, накіраваных на павышэнне надзейнасці і эфектыўнасці работы энергаблока.